ما تتمكيجيش
عشان نور برائتك بيفرق معايا
ما تتبرفنيش
دا عطر المشاعر لوحده..كفاية
ولا تحطى LENSES
و سيبي عيونك تقوللي الحكاية
ولا احمر ولا اخضر
مافيش حاجة تقدر
تحلّيكي أكتر
وصلتي فـْ جمالك لحد النهاية
ياريت حاجة تقــــدر توحّش شوية
عشان نور جمالك بقى كتير عليّا!
و واصل في عشقك خلاص منتهايا !
دا وشك بيحلــَى أوي بضحكتك
ولو حتى تنــــــزل عليه دمعتك
في حزنك بيبقى جمالك حكاية !
مادام قلبي راضي يكون ليكي دارك
بياضك في عيني مساوي لسمارك
ولون قلبك انتي البطل في الرواية
كفااااااااااية ابتسامتك
محليّة كل السنين اللي جاية
عشقتك فـ ْفرحك ودبت فـْ همومك
مايفرقشي عندي خلاص لون هدومك
مادام شمس قلبك تنور سمايا
ولا لون عينيكي ولا َطول رموشك
مافيش حاجة عنّي هتقدر تحوشك
كفاية ان قلبك جمال روحُه آية
فسيبك من اللي بيخدع عينكي
مرايتك يا عمري بتكدب عليكي
لإن الجمال اللي انا عاشقه فيكي
ما بيبانشي أصلاً في قلب المراية!
0 التعليقات:
إرسال تعليق